आजौ तक नहीं बनी कालोनी

चित्रकूट जिला, ब्लाक पहाड़ी, गांव अर्की, मजरा करौंदिहाई मा 25 अप्रैल 2016 का अचानक आगी लागै से बासठ घर जल गे रहै। जेहिमा अट्ठावन घर पूरतान खाख होइगे और चार घर का नुकसान कम था रहै। वा समय शासन प्रशासन अउर पार्टी वाले बढ़ चढ़ के गांव के लोगन का भरोसा दिहिस कि तुरतै सब का रहैं का घर पहिने का कपड़ा खाये का खाना दवाई दें का 27 अप्रैल का खबर लहरिया के सउहें अधिकारी कहिन रहैं,। पै एक महीना होय के बादौ आज करौदिहाई गांव के हाल वहै हवै।
27 मई 2016 का खबर लहरिया पत्रकार जा के देखिन तौ पता लाग कि मड़ई वहिनतान भूखन पियासन घाम मा परा बइठ रहत हवै।
मोहन, कैलाश अउर सुमेर, बताइन एक महीना होय के बादौ घर नहीं बने आहीं। या मामला मा गांव के मड़इन से बात करै मा पता लाग कि 24 मई का उत्तर प्रदेश के कैबिनेट मंत्री शिवपाल यादव कर्वी आय रहैं तौ इक्यावन लोगन का लोहिया आवास बनवावै खातिर हर मड़इन का एक लाख सैंतिस हजार पांच सौ रूपिया के चेक दिहिन हवैं। चार लोगन का इन्दरा आवास खातिर एक लाख बीस हजार के चेक दीन जई अउर पांच लोगन का पन्द्रह हजार से बीस हजार रूपिया तक दीन जई। इं कालोनी बनै खातिर अबै चार महीना लाग जइहैं। पता नहीं कसत मड़ई बरसात मा गुजारा करी।
प्रधान विद्या देवी का बेटवा राजीव प्रताप सिंह कहिस कि सरकार पूर मद्द करै मा लाग हवै। चार महीना मा कालोनी बन जइहैं। सरकार बहुतै नींक काम करिस हवै। एक लोहिया आवास तौ मिलत नहीं आय, पै करौंदिहाई खातिर इक्यावन लोहिया आवास सरकार दिहिस हवै। अबै तक जले घरन का मलवा काहे नहीं साफ करवावा गा। यहिके बारे मा या वा कहिस या तौ सालन चलत रही धीरे धीरे साफ होई।

रिपोर्टर – खबर लहरिया ब्यूरो