आग से पीड़ित मनइन का नाय मिला मुआवजा

जिला अम्बेडकर नगर। हिंआ तीन महीना के अन्दर लगभग 372 घटना आग लागै से भै बाय। लगभग पौने दुई करोड़ रुपया कै सम्पत्ति जलकर राख होइगै। तीन मनइन कै जान भी चलीगै। लगभग दई दर्जन से ज्यादा जानवर भी जलि गये। यतना सब नुकषान हो जाय के बाद भी आग से पीड़ित किसानन का मुआवजा नाय मिला बाय।
भीटी तहसील क्षेत्र के रामउजागिर अउर संतराम कै कहब बाय कि विजली के हाईटेंषन तार से आग लाब रही चार बीघा गेहूं कै फसल जलिकै राख होइगै। सूचना दियै पै भी राजस्व कर्मी सर्वे करै नायं आये।
दैविक आपदा अधिकारी राकेश  चन्द्र शुक्ला कै कहब कि पूरे तीन महीना मा 372 घटना आग से भै बाय। 255 परिवार के घर कै पूरा राशन जला बाय। लगभग छह सौ बीघा से ज्यादा अरहर गेहूं कै फसल जलिगै। एक करोड़ सत्तर लाख छियासी हजार पांच सौ रुपया कै सम्पत्ति नष्ट होय गै। शासन का यकै सूची भेजी जाय चुकी बाय।
अपर जिलाधिकारी राममूरत पाण्डेय कै कहब बाय कि आग लागै कै घटना के मनइन का आवश्यक सहायता नियम के अनुसार दीन गै बाय। शासन से जवन दिशा निर्देंष बाय वकरे अनुसार आर्थिक सहायता दीन गै बाय।