आग लागै से गेहूं अरहर कै फसल जरिके भै राख

जिला अम्बेडकर नगर, ब्लाक टांडा अउर कटेहरी। हिंआ के अलग अलग गांव मा आगि लागै से लगभग सात बीघा फसल जरिके राख होइगै। लेखपाल मुआवजा दियै के ताई सर्वे करिन।
कटेहरी ब्लाक के मुस्लिम पट्टी गांव मा बिजली के खम्भा कै तार टूटिके गिर जाए से गेहू के खेत मा आगि लागिगै जेसे रामलखन पाल कै छह बिस्वा बब्बन तिवारी कै सात बिस्वा, मींकू तिवारी कै सात बिस्वा गेहूं जरिके राखी होइगै। 30 मार्च 2016 का शाम लगभग साढ़े चार बजे आगि लाग। गांव कै प्रधान लेखपाल का बुलाय के सर्वे कराये अहै। वहीं टांडा ब्लाक के काजीपुर ग्रामसभा के दरियापुर बंजारा गांव मा 4 अप्रैल का दिन के लगभग बारह बजे आगि लागै से गेहू अरहर कै फसल जरिके राख होइगै।
गांव के राजेश, सुभाष, हरिश्चन्द्र, चुन्नीलाल बताइन कि आगि लागै के खबर पै पूरा गांव कै मनई जब तक आगि बुझाइन तब तक तीन बीघा गेहूं अउर पांच बिस्वा अरहर जरिके राखी होइगै। एनटीपीसी अग्निशमन पहुंचा। सूचना पै पहुंचे लेखपाल मुआयना करिन।
कटेहरी कै लेखपाल मोतीलाल यादव बताइन कि सर्वे कइके भेज दिहे हई।