आगी लागैं से मउत

जिला बांदा, ब्लाक नरैनी, थाना अतर्रा, गांव महुटा। हेंया के परदेशिया के औरत रानी के मउत 3 नवम्बर का शाम के आगी लागैं से होइगे। मायके वाले अतर्रा थाना मा परदेशिया के खिलाफ रपट कइके कारवाही के मांग करिन हैं।
रानी का भाई विनोद बताइस-“रानी के शादी 3 जून 2015 का भे रहै। परदेशिया के शिकायत रानी बतावत रहै कि हमेशा मारपीट करत रहत है। घटना वाले दिन भी चइला से मारिस रहै। रानी महतारी से बताइस रहै कि परदेशिया वहिकर मंगलसूत्र छीन के गांव के कउनौ लड़की का दई दिहिस है। यहिकर विरोध करैं मा रानी के ऊपर बहुतै मार पड़ी रहै। हम अतर्रा थाना मा रपट लिखैं खातिर दरखास दीन है।”
परदेशिया का कहब है-“जउने समय रानी आगी लगाइस है। वा समय मैं नदिया मा ट्रैक्टर धोवैं चला गये रहैं। मोर बाप गुलुवा महतारी लीला चिल्लाय के आवाज सुन के भीतर गे अउर जिला अस्पताल लावा है। रात के ही वहिके मउत होइगे। मैं वहिके साथैं मारपीट नहीं करे आहूं।”
अतर्रा थानाध्यक्ष राजेश पाण्डेय का कहब है कि पोस्टमार्टम रिपोर्ट आवैं के बाद कारवाही कीन जई। 16 नवम्बर तक रिपोर्ट नहीं आई रही आय।