अस्पताल में नईं आउत हे डाक्टर

जिला महोबा, ब्लाक जैतपुर, गांव अजनर। एते के प्राथमिक स्वास्थ्य केन्द्र में 4 जनवरी से कोनऊ डाक्टर नईं जात हे। जीसे आदमी इलाज के लाने एते ओते भटकत हें। विभागीय अधिकारी खा जानकारी होंय के बाद भी कोनऊ ध्यान नईं देत हे।
राधाबाई ओर मुन्ना कहत हे की अस्पताल दो महिना से कम्पाउडर के सहारे चलत हे। डाक्टर न होंय के कारन इलाज अच्छे से नईं होत हे। जीसे प्राइवेट अस्पताल में इलाज करानें परत हे।
आरी गांव को गोरेलाल कहत हे की हमाओ गांव उजनर से सात किलो मीटर दूर हे। रुपइया न होंय के कारन एते आउत हे। काय से एक रुपइया में इलाज हो जात हे। एते डाक्टर न होंय के कारन बिना जांच के दवाई कम्पाउडर दवाई देत हे। अजनर प्राथमिक स्वास्थ्य केन्द्र को कम्पाडर लोलेश कहत हे की डाक्टर मेडिकल लगाये हे। पेहले कभऊं-कभऊं आ जात हतो, पे जनवरी से बिल्कुल नई आओ हे। में का कर सकत हो।
जैतपुर प्राथमिक स्वास्थ्य केन्द्र के अधिक्षक कहत हे की ओते को डाक्टर मेडीकल लगाये हे। हम दूसर डाक्टर खा नईं भेज सकत हे। अगर ज्यादा बिमार मारीज होत हे तो ई अस्पताल मे आ जात हे। कभऊं-कभऊं हम खुद जात हे।