हिलुवा गांव के आदमी
जिला महोबा, ब्लाक कबरई, गांव लुहेड़ी को मजरा हिलुवा के लगभग दो दर्जन आदमियन ने 25 नवम्बर 2014 खा अलग ग्राम पंचायत करें खे लाने डी.एम. खा दरखास दई हे। साथई विकाश करायें की मांग करी हे।
हिलुवा गांव के रामकृपाल ओर जीतेन्द्र बताउत हे कि दोनऊ गांव की आबादी लगभग पांच हजार हे। गांव के विकास करायें के लाने कोनऊ ध्यान नई देत हे।
रमाशंकर, देवेन्द्र, लक्ष्मन, परमलाल के साथे दर्जनन आदमियन ने डी.एम. वीरेश्वर खा लिखित दरखास में कहो कि हमाये गांव में सी.सी. रोड, बन्धी डलवायें को काम अधूरो परो हे। मजदूरन को रूपइया भी नई मिलो हे। दरखास में ग्राम पंचायत अधिकारी ओर प्रधान के ऊपर मनमानी को आरोप लगाओ हे।
इन्द्रपाल ओर रामाधार ने कहो कि गांव में कोटेदार, पानी, स्वास्थ, ओर विकाश की कोनऊ सुविधा नइयां। जीसे विकास ओर आदमियन खा लाभ मिल सके।
प्रधान जानकी के आदमी मोहन ने बताओ कि लुहेड़ी गांव 2014 में लोहीया हो गओ हे। हिलुवा गांव नई भओ हे। जीसे ज्यादा विकाश नइयां। हम कोशिश करत हे कि ऊ गांव भी लोहीया हो जाये तो जीसे ज्यादा विकास करा सकन।
डी.एम. वीरेश्वर सिंह ने दरखास खा गम्भीरता से लेके ओर आबादी खा मानक में होंय पे, अलग ग्राम पंचायत करें को भरोसा दओ हे।