जिला बांदा। 1 मई से भारत सरकार कइत से अन्त्योदय अउर बी. पी. एल. राशन कार्ड धारकन का सेत मा गैस कनेक्शन दे के योजना चलाई गे है। जेहिसे कस्बा से लइके गांव देहात मा होय वाली गैस एजेन्सी मा भीड़ रहत है।
नरैनी ब्लाक, गांव नौगवां मजरा छिगरिया पुरवा। सुरेश बतावत है कि मैं गरीब मड़ई मोर लगभग पांच साल से अन्त्योदय कार्ड बना है अउर 2015 मा रिन्यू भी होइगा है पै कार्ड मा औरत सुनीता का नाम नहीं चढ़ा या मारे हमार गैस कनेक्शन का फारम नहीं भरा जात आय। चार दिन होइगे बराबर फारम भरैं जात हौं। चार दिन होइगे बराबर फारम भरै खातिर कालिंजर गैस एजेन्सी से लउटत हन अउर नाम चढ़वावैं खातिर सप्लाई आफिस से लउटत हन। हमार रोज का लगभग 100 रूपिया किराया मा खर्च होत है।
तिन्दवारी ब्लाक, कस्बा चिल्ला के बसन्ता, संध्या अउर शिवमंगल का कहब हवै कि 1 मई से गांवन मा गाड़ी प्रचार करत फिरत रहै कि अन्त्योदय अउर बी.पी.एल. वालेन के सेत गैस कनेक्शन होत हैं। जेहिके खातिर मड़ई आपन सब कागज लइके गैस एजेन्सी मा जमा करत हैं। वहिमा भी घण्टन लाइन लगावै का परत है। चिल्ला गैस एजेन्सी के मैनेजर का कहब है कि शासन कइत से लिस्ट आई है। वा लिस्ट के आधार से महिला मुखिया के नाम सेत मा कनेक्शन होत है। वहिमा भी कइयौ के राशन कार्ड मा महिला का नाम निहाय या फिर गलत है इनतान के बहुतै समस्या है।
रिपोर्टर – गीता और शिवदेवी