अनशन के बाद अपराधी खा भेजो जेल

जिला महोबा, ब्लाक कबरई, थाना श्रीनगर क्षेत्र के एक मोहल्ला कि 8 मार्च 2015 खा 14 साल की लड़की गुम हो गई हती। जीखी दरखास श्रीनगर थाना मे दई हे, पुलिस की लापरवाही के कारन 23 मार्च तक कछू पता नई चलो। परिवार वाले ने 21 मार्च से 23 मार्च तक कचहरी में आमरण अनशन करें करो हे। पुलिस ने 23 मार्च खा लड़की की खोज करी हे।
लड़की को बाप बताउत हे कि 8 मार्च खा अपने चाचा के एते मिलन गई हती। ऊखे बाद से सितारा घर नई आई। हमने रिस्तेदारी में पता करो, पे कहूं पता नई चलो हे। श्रीनगर थाना में दई हे। 11 मार्च 2015 खा सुबरे अच्छन पुत्र अल्ली ओर ऊखो दोस्त इकबाल पुत्र इब्राहिम ने बुलाओ ओर कहो कि एक दो दिन के बाद तुम्हाई बिटिया आ जेहे। रिपोर्ट न करो, साथे धमकी दई की रिपोर्ट करहें तो लड़की जिन्दा न बचहे। लड़की से मिले खा कहो तो दोनऊ धमकी देके भाग गये। ईखी दरखास एस.पी.खा दई तो जांच कर रिपोर्ट लिखे को आदेश दओ हतो। ऊखो आरोप हे कि श्रीनगर थाना एस.ओ. रिपोर्ट नई लिखी हे, कहत हे कि अच्छन पुत्र अल्ली की रिपोर्ट लिखहे इकबाल की रिपोर्ट न करो नई तो तुम्हाई रिपोर्ट न लिखहे। श्रीनगर एस.ओ. नयन सिंह कहत हे लड़की मिल गई हे। अच्छन के खिलाफ धारा 363, 366 के तहत मुकदमा लिख गओ हे। 24 मार्च खा लड़की की डाक्टरी करा अच्छन खा जेल भेजो जेहे।