अंधियारें में डूबो गांव

जिला महोबा, ब्लाक कबरई, गांव खरका। एते दस साल पेहले बिजली आई हती। दो साल के बाद बिजली के तार ओर खम्भा की चोरी हो गई हे। जभे से अभे तक बिजली की कोनऊ सुविधा नईयां। जीसे पूरो गांव अधियारे में डूबो हे।
गांव के रहे वाले ज्ञान सिंह रामकिशन ओर राम दयाल, ने बताओ कि एते की आबादी तीन हजार ओर वोटर चैदह सौ हे। हमाए गांव में दस साल पेहले बिजली के तार खम्भा लगे हते। दो साल के बाद लगभग दो किलो मीटर दूरी के बिजली के तार की चोरी हो गई हे। जीसे हमे अधियारें में रहे खें परत हे। ईखे लाने हमने केऊ दईयां प्रधान से कहो हे ओर 26 जनवरी खे 2012 जिला पंचायत अध्यक्ष अंशु शिवहरे से कहो हे, पे कोनऊ सुनवाई नई होत आय। बिजली बिना हमे बोहतई परेशानी आउत हे न तो मोबाइल चार्ज होत हे। ओर न बच्चन की पढ़ाई हो पाउत आय। गांव के पचास आदमी कनेक्शन लेय खा तैयार हे भी हे ओर फारम भर के प्रधान के एते जमा कर दए पे बिजली बने की अभे कोनऊ सुनवाई नइया।
प्रधान जयपाल सिंह के लड़का बच्चा सिंह ने बताओ कि एक महीना पेहले जिला पंचायत अंशु शिवहरे खे प्रस्ताव दओ हतो तो ऊने कहो हतो कि राजीव गांधी विद्युत योजना में प्रस्ताव भेज दओ हे। एक लिस्ट आ गई हे। जभे दूसरी लिस्ट आ जेहे तो बिजली बनवा दई जेहे।
कबरई बिजली विभाग के जेई रामकरन ने बताओ कि ओते के आदमी कनेक्शन लेय खे तैयार नइया गांव के आदमी कनेक्शन लेय खें तैयार हो जाय ओर डी.एम. से कहे तो ओते को सर्वे करा के बिजली बनवा दई जेहे।
जिला पंचायत अध्यक्ष अंशु शिवहरे ने बताओ कि ओते तारो की चोरी हो गई हती। हमने दरखास भी दई हे, पे ऊपर के अधिकारी ध्यान नई देत आय।