नहीं मिली कालोनी के दूसर किस्त

kaloni copyजिला चित्रकूट, ब्लाक रामनगर, गांव पहाड़ी। हिंया के रहैं वाले मड़इन का कहब हवै कि इंद्रा आवास के तहत सरकार कइती से कालोनी मिली रहैं। कालोनी का एक किस्त का रुपिया मिल गा रहै, पै अबै तक दूसर किस्त का पैतिस हजार रुपिया नहीं मिला आय। यहिके खातिर प्रधान ननकी देवी से 3 अप्रैल का कहा गा। वा भरोसा दिहिस रहै कि यहिके खातिर ब्लाक मा कहा जई।
गांव के स्वरुपरानी नाम के औरत का कहब हवै कि इंद्रा आवास के तहत कालोनी मिली रहै। वहिका एक किश्त का रुपिया मिल गा रहै। वहिमा कालोनी के दीवार बनवा लीने हौं। कालोनी मा छत डरवावैं खातिर अब मोरे लगे रुपिया नहीं आय। अगर दूसर किस्त का रुपिया मिल जात तौ कालोनी के छत डरवा लेतेंव। काहे से कि मैं पन्नी डार के झोपड़ी मा रहत हौं। वा बरसात मा चुवत हवै अउर गर्मी मा धूप से गरमात हवै।
प्रधान ननकी के मनसवा का कहब हवै कि या गांव लोहिया हवैं दस इंद्रा आवास अउर पांच लोहिया आवास के मांग ब्लाक मा कीन गे हवै।
रामनगर ए.डी.ओ. चंद्रभान गुप्ता का कहब हवै कि अबै सरकार कइती से इंद्रा आवास के तहत दूसर किस्त का रुपिया नहीं आवा हवैं। दूसर किस्त का रुपिया अई तबहिने मिल सकत हवैं।

  रिपोर्टर: सहोद्रा देवी