कभे होहे पानी की समस्या दूर

09-01-14 Mahoba Sampaadakiya (web)बुन्देलखण्ड में तो पानी की समस्या आम आदमियन खा मुसीबत बन गई हे। हर मौसम में पानी खा तरसे खा परत हे गर्मी होय चाहे ठंडी।
महोबा जिला ऊसई तो तालाबन खा बोहतई प्रसिद्व हे। पे पहाड़ी इलाका होय के कारन ई समय भी केऊ गांवन के आदमी पिये के पानी खा तरसत हे।
काय से कोनऊ हैण्डपम्प बिगरो हे, कोनऊ में पानी नई निकरत आय, तो कोनऊ टंकी के सप्लाई बंद परी हे। जीसे बूंद-बूंद पिये के पानी खा भटकत हें।
जभे कि उत्तर प्रदेश सरकार ने बुन्देलखण्ड खा पानी की समस्या दूर करे खा विशेष पैकेज दओ हतो। ऊखें बाद भी जनता पानी खा एते ओते भटकत हे। सरकार जा समस्या दूर करें खा ठोस कदम काय नई उठावत हे। जभे वोट के समय होत हे तो सरकार बोहतई वादे करत हे, सरकार बने के बाद सब भूल जात हे। आखिर सरकार गरीब जनता के साथे एसो काय करत हे। जनता की परेशानी दूर करें की जिम्मेंदारी किखी आय? जभे कोनऊ भी काम खा बजट आउत हे तो ऊ काम काय नई कराओ जात हे। बजट खत्म हो गओ ओर समस्या जेसे के तेसे हे तो ऊ बजट कहां गओ गओ हे। ई बात की जबाब को महोबा जिला की जनता करत हे?
का शासन प्रसासन को पेट आपने वेतन से नई भरत हे, जोन गरीब आदमी के साथे एसो करो जात हे। ई खी जबाब देही भी शासन प्रशासन खा अपन कर्मचारियन से लेय खा चाही? तभई महोबा जिला में पानी की समस्या दूर हो सकत हे।