पेंशन खे लगाउत चक्कर

जिला महोबा, ब्लाक जैतपुर, कस्बा कुलपहाड, मोहल्ला कटबरिया। एते के उजयारी बृद्धा पेंशन के मांग खे तहसील ओर कचेहरी के चक्कर लगाउत फिरत हे। ऊखे बाद भी कोनऊ सुनवाई नइयां।
कस्बा के रहे वाली उजयारी ने बताओ कि मोए आदमी रामदयाल खा मरे पांच साल हो गए। मोए एक लड़का हे ऊ दिल्ली मे रहत हे । मोई कभऊ खबर तक नई लेत आय। जा समय मोई उम्र भी 65 साल की हे। जीसे मेहनत मजदूरी को कोनऊ काम भी नई कर सकत हों। एई से मे पेंशन खे पांच साल से तहसील ओर कचहरी के चक्कर लगाउत हो ओर तहसील दिवस मे भी केऊ दइयां दरखास दई हे। पे कोनऊ सुनवाई नइयां। जीसे बुढ़ापे मे कछु सहारा हो सके।
कुलपहाड़ तहसील मे आय जाति से सम्बन्धित कोनऊ भी फारम देखे वाले विवध लिपिक किसनलाल ने बताओ कि अगर उजयारी को फारम अगर तहसील दिवस मे आओ हो हे, तो ऊखे समाज कल्याण मे भेज दओ हो हे। अब ओते से पास होंय के बाद ऊखे बृद्धा पेंशन मिलन लग हे।