खाना ओर पढ़ाई में होत लापरवाही

बताउत पढ़ाई ओर मिड्डे मील की परेशानी

जिला महोबा, ब्लाक पनवाड़ी गांव महुआ। एते के कन्या प्राथमिक स्कूल में सई से मिड्डे मील को खाना नई बनत आये, ओर मास्टर बच्चन के पढ़ाई मे भी लापरवाही करत हे। जीसे बच्चन के मताई बाप ने मिल के 3 सितम्बर 2013 कुलपहाड़ तहसील में दरखास दई हे।
रामप्रकाश, दुलइया, कुसुम, रामस्वारूप और गौरीशंकर ने बताओ कि ई कन्या प्राथमिक स्कूल में हमाई बिटियन खा मिड्डे मील को खाना नई मिलत आये। जोन हेडमास्टर ओर शिक्षा मित्र हे,ं ऊ सब गांवई के आये। एई से ऊं पढ़ाये में भी लापरवाही करत हंे। एई से हम लोग चाहत हे कि ईं मास्टरन खा हटा के दूसरे गांव के मास्टर लगायें जाये। काय से बच्चन खा मिड्डे मील को खाना मिले चाहे न मिले, पे बच्चन की पढ़ाई तो अच्छे से हो हे।
कन्या प्राथमिक स्कूल की हेडमास्टर ऊषा राजपूत ने बताओ कि हमाये स्कूल में खाना ओर पढ़ाई खा लेके कोनऊ लापरवाही नई होत हे। गांव के कछु आदमी स्कूल में गुटका खाके आउत हें, ओर जुआं खेलत हे। हमने केऊ दइयां मना करो हे। जीसे ऊ आदमी जलत हे, ओर झूठी दरखास दई हे।
प्रधान ईश्वरदास ने बताओ कि में अब स्कूल में मिड्डे मील को खाना नई देखत हों। ईखी जिम्मेंदारी स्कूल के मास्टरन खा दे दई हें। कछु आदमी मोये एते स्कूल की शिकायत करें आये हते तो मेने अपने दसख्त कर मोहर लगा दये हते।
जिला बेसिक शिक्षा अधिकारी मसी हुज्जमां सिद्दीकी ने बताओ कि ओते मिड्डे मील के बारे में हमें कछु जानकारी नइयां। अब ईखी जांच करा के कारवाही करी जेहे।