स्वच्छ भारत अभियान के तहत पैसा कै गबन

taza-final-2जिला अम्बेडकर नगर, ब्लाक टांडा, ग्रामपंचायत अवसानपुर। हिंआ गांव कै मनइन अउर वर्तमान प्रधान कै आरोप बाय कि प्रधानमंत्री नरेन्द्र मोदी द्वारा चलाईगै योजना स्वच्छ भारत अभियान के तहत आय बजट का पूर्व प्रधान गबन कै लिहिन।
अवसानपुर गांव कै वर्तमान प्रधान वंशराज वर्मा बताइन कि पूर्व प्रधान श्रीमती रेखा वर्मा स्वच्छ भारत अभियान के तहत गांव मा शौचालय बनवावय का जेतना धनराशि दिखाये रहिन बजट तौ पूरा आय लकिन 2014-15 के तहत अट्ठानवे लाख सोलह हजार वित्तीय वर्ष कै आय रहा। जेहमा से तीन सौ अट्ठासी शौचालय के निर्माण मा छियालिस लाख छप्पन हजार खर्च कइगै बाय। अउर चार सौ तीस शौचालय कै निर्माण नाय करायगै। वर्तमान प्रधान सब जानकारी के बाद सूचना विभागीय अधिकारी का दइके जांच कै मांग करिन। जांच के बाद आठ सौ अट्ठारह शौचालय कै धन इक्यावन लाख साठ हजार रुपया कै गबन पाइगै।
पूर्व प्रधान रेखा वर्मा बताइन कि हम तीन सौ चौवालिस शौचालय बनवाये रहेन वहमा से कुछ टूटगै बाय। जेकरे सत्यापन के ताई अधिकारिन के पास सारा डिटेल भेज देहे हई। जल्दी यकै खुलासा होये।
जिला पंचायत सहायक विकास अधिकारी सैय्यद नदीम रजा बताइन कि पूर्व प्रधान रेखा देवी गांव कै ग्राम सचिव विनोद कुमार व जसवंत कुमार के खिलाफ चार दिन के अन्दर मुकदमा दर्ज कराय के प्राथमिकी डीएम तक पहुचावय का आदेष दिया गै बाय।