सूखा राहत का चेक अई तौ मिली

chatrakootजिला चित्रकूट, ब्लाक मऊ, कस्बा खण्डेहा। हिंया के किसान कहिन कि हमका सूखा राहत के तहत मुआवजा नहीं मिला आय। यहिसे हम किसान दुइ जून खाये का तरसित हन।
कस्बा के मोहन अउर रमेश का कहब हवै कि हम लोग खेती किसानी कइके अपने परिवार का खर्च चलाइत हन। तीन साल से खेती मा कउनौ भी फसल नींक नहीं भे आय। रुपिया न होय के कारन अपने बचचन का नींक से नहीं पढ़ा पाइत हन। खेती का छोड़ के हमरे लगे अउर कउनौ दूसर काम धंधा भी नहीं आय। सूखा राहत का चेक लें खातिर सचिव संगमलाल से 15 मई का कहा गा रहै। सचिव कहत रहै कि अबै तमु लोगन का सूखा राहत के तहत चेक सरकार के लगे से नहीं आवा आय।
या समस्या का लइके सचिव संगम लाल से खबर लहरिया पत्रकार बात करिन। सचिव कहिस कि सूची बना के किसानन का नाम दइ दीन गा हवै। जबै सरकार कइती से सूखा राहत का चेक अई तबहिने मिल सकत हवै।

रिपोर्टर – सहोद्रा देवी