सफाई से टूट पुलियां

जिला महोबा, ब्लाक जैतपुर, गांव सतारी। एते पचासन साल पुरानी बेलाताल तालाब से नहर निकरी हे। जीखी सफाई दसन साल से नई भई हती। अभे एक महीना पेहले जे.सी.बी. मशीन से सफाई कराई गई हे। जीसे मशीन से सफाई करत में नहर की तीन पुलिया टूट गई हें।
हीरालाल ओर रामसिंह ने बताओ कि दसन साल के बाद नहर खे सफाई होय की नोमत आई हे। अमरसिंह बताउत हे कि सरकार ने ई साल नहर की सफाई जे.सी.बी. मशीन से कराई हे। जीसे तीन पुलिया टूट गई हें। ईं पुलियन से तीन गांवन (कुनहटा, चुरारी ओर सतारी) खा सींच के लाने पानी मिलत हतो। अभे तक नहर में घास-फूंस के कारन किसानन खा पानी नई मिलत हतो। अब ई साल पुलिया टूटे के कारन गांव के हजारन किसान आपन खेती नई सींच पाये हें। एसी महंगाई में पम्पसेट से सिंचाई कराहें तो हजारन रूपइया खर्चा लगहे। अगर दस बीघा खेती पम्पसेट से सिंचाबी, तो ई साल की फसल सिंचाई भर खा होहे।
प्रधान शोभारानी के लड़का महेन्द्र सिंह ने बताओ कि जैतपुर के कैनाल विभाग से नहर की सफाई कराई हे। नहर में पानी के कारन पुलिया न सुधरहे।
सिंचाई विभाग के ड्राफ्टमैंन (प्रारूपकार) भागीरथ वर्मा ने कहो कि पुलिया टूटे की जानकारी मोये नइयां।