सप्लाई नल के पाइप अउर हैण्डपम्प के करत मांग

murka kasba taza
कबै दूर होइ समस्या

 जिला चित्रकूट, ब्लाक मऊ, कस्बा मुरका। हिंया लगभग तीन बरस से सप्लाई नल वाली पाइप लगावैं खातिर मड़ई मांग करत हवैं। पानी खातिर लगभग पांच हजार मड़ई परेशान हवैं। सप्लाई वाली पाइप लगवावैं खातिर कइयौ दरकी कर्वी जल परियोजना इकाई अस्थाई निर्माण खण्ड मा कहा गा, पै कउनौ ध्यान नहीं दीनगा।

या समस्या का लइके कर्वी जल परियोजना इकाई अस्थाई निर्माण खण्ड के प्रबन्धक राजेश गुप्ता का कहब हवै-“ मुरका कस्बा मा सप्लाई वाली पाइप लगवावैं खातिर सरकार से मांग कीन जई।”
कस्बा के उदयराज मौर्य, दिनेश, शहजाद अली अउर मुहम्मद का कहब हवै कि पानी के बहुतै समस्या हवै। गर्मी मा पानी खातिर हिंया-हुंवा भटकैं का परत हवै। पानी भरैं के चक्कर मा बच्चन का स्कूल जाये खातिर देर होइ जात हवै। कत्तौ कत्तौ बच्चा बिना नहाये स्कूल चले जात हवैं। अगर सप्लाई नल वाली पाइप लाइन पर जाये तौ हमार इं सबै समस्या खतम होइ सकत हवै। पता नहीं कि कबै तक सप्लाई वाली लाइन परी।
जिला चित्रकूट, ब्लाक मऊ, कस्बा बरगढ़ वार्ड नम्बर सात। हिंया लगभग तीन बरस से हैण्डपम्प खराब हवै। यहै से मड़ई पांच सौ मीटर दूर कुंआ से पानी लावत हवंै। या समस्या का सकैड़न मड़ई उठावत हवंै। नवा हैण्डपम्प लाग जाये तौ पानी के समस्या से न जूझै का परी। यहिके खातिर कइयौ दरकी प्रधान प्रकाश चन्द्र केशरवानी से कहा गा, पै वा ध्यान नहीं देत हवै।
कस्बा के अब्दुल वाजिद, नसीमुद्दीन अउर फिरदौश का कहब हवै कि पानी के समस्या हवै। तीन बरस से हैण्डपम्प खराब हवै। त्यौहार मा तौ अउर ज्यादा पानी के जरूरत परत हवै। काहे से कि मेहमान आवत जात हवैं। कुशवाहा बस्ती मा एक कुंआ हवै। वा पांच सौ मीटर दूर हवै। हुंवा से पानी लइत हन। कुंआ मा पानी भरैं खातिर लम्बी लाइन लगावैं का परत हवै।
मऊ ए.डी.ओ. पंचायत वृन्दा प्रसाद का कहब हवै कि प्रधान प्रकाश चन्द्र केशरवानी अउर सचिव रामलाल मिश्रा से कहा जई। नवा हैण्डपम्प लगवावा जई।