सड़क खराब का सुधारब केहिके जिम्मेदारी

गिरवां से खुरहण्ड जाय वाली सड़क के हालत
गिरवां से खुरहण्ड जाय वाली सड़क के हालत

जिला बांदा, ब्लाक महुआ, कस्बा गिरवां । गिरवां से खुरहण्ड जाये वाली बारह किलोमीटर सड़क लगभग तीन साल पहिले बनी रहै। अब या सड़क एक साल से जर-जर परी हैै। या सड़क से गुजरैं वाले दसन गांव के मड़ई अउर वाहनन का बहुतै परेशानी होत हैै।
आटो चलावैं वाले ड्राइवर राजू, अशीष, राजा, बब्बू अउर टिंकू बतावत हैं कि जबै सडक नींक रहै तबै हम लोग सवारिन से भरी गाड़ी आधा घण्टा मा गिरवां से खुरहण्ड पहुंचावत रहन। अब यहै सड़क मा डेढ़ से दुई घण्टा लागत हैं। सड़क बनवावै खातिर प्रशासन कउनौ ध्यान नहीं देत आय। जबै कि सब गाड़ी वाले हर साल मिलके अट्ठारह सौ रूपिया सड़क टैक्स भी भरत हैं। या सड़क से ओवर लोड ट्रक भी रातो दिन निकरत हैं।
अर्जुनाह गांव से आई सुनीता अउर छिबांव गांव से आई सुशीला कहत हैं कि या सडक से यात्रा करै मा यतना दच्चा लागत है कि बीमार जइसे होई जात हन।
पी.डब्लू.डी. निर्माण खण्ड एक के सहायक अभियन्ता सत्यपाल सिंह कहत है कि अबै वा सड़क खातिर बजट नहीं आवा आय। प्रस्ताव बना के शासन का कइयौ दरकी भेज दीन गा है। बजट आवैं के बाद काम करावा जई।