विभाग भेजिस प्रस्ताव

गम्भीर हालत मा बबेरू से कमासिन सड़क
गम्भीर हालत मा बबेरू से कमासिन सड़क

जिला बांदा, ब्लाक बड़ोखर खुर्द गांव पण्डुई, ब्लाक महुआ का गांव माधवपुर अउर बबेरू व कमासिन ब्लाक के कइयौ गांव। नरैनी मेन रोड से पण्डुई गांव तक तीन किलोमीटर अउर बबेरू से कमासिन तक बीस किलोमीटर सड़क उखड़ी परी है। इं सड़कन से गुजरैं वाले राहगीर अउर साधनन का बहुतै दिक्कत होत है। पण्डुई गांव के चुन्नीलाल, फूलचन्द्र अउर माधवपुर के प्रेमचन्द्र अउर शिवदुलारी कहत हैं कि या सड़क लगभग सात साल पहिले बनी रहै। अब एक साल से उखड़ी परी है। या सड़क से पांच गांव के मड़ई आवत जात है। या सड़क बनैं खातिर हम पी.डब्लू.डी. विभाग मा कहि चुके हन, पै सुनै वाला कउनौ निहाय।
पी.डब्लूडी. खण्ड एक का सहायक अभियन्ता इन्जीनियर सत्यपाल सिंह का कहब है कि वा सड़क का प्रस्ताव बना के लगभग पन्द्रह दिन पहिले भेज दीन गा है। सडक के दूरी 3.800 किलोमीटर है। लगभग साठ लाख रूपिया का प्रस्ताव बना के भेजा गा है।
कमासिन ब्लाक के पाली गांव का बु़द्धी, बुढ़ौली गांव के अनुज, धीरज अउर हरी मोहन, पप्पू का कहब है कि या सड़क पांच साल से खराब है। यहिमा तीस रोडवेज बस चलत हैं। डग्गामार साधन के कउनौ गिनती निहाय। आय दिन एक्सीडेन्ट जइसी के घटना होत रहत हैं।
बबेरू पी.डब्लू.डी. अध्यक्ष गया प्रसाद का कहब है कि या सड़क का प्रस्ताव बना के जनवरी 2014 मा लखनऊ भेज दीन गा है। प्रस्ताव अउर बजट पास होय के बाद सड़क बन जई।