विभाग दुर्घटना का करत इंतजार

DSCN6659
पेट्रोल पम्प के सड़क

जिला चित्रकूट, ब्लाक कर्वी, कस्बा कर्वी। हिंया के राष्ट्रीय राजर्माग सड़क के हालत बहुतै बिगड़ चुकी हवै। या सड़क से रोज का लाखन मड़ई यात्रा करत हवै। लोक खण्ड निर्माण विभाग बांदा के अधिकारी हाथ मा हाथ घरे बइठ हवैं। सड़क बनावैं का नाम नहीं लेत आय।
रामनगर के रामऔतार अउर श्याम, भौंरी के पवन अउर सरिता, रैपुरा गांव के कामता समेत पन्द्रह लोगन का कहब हवै कि ट्राफिक चैराहा अउर पेट्रोल पम्प से बैरियल तक सड़क तीन बरस से बहुतै खराब हवै। जबै मुख्यमंत्री अखिलेश सिंह यादव 19 जून 2013 का आय रहै, तौ रातौ दिन सड़क के गढ़वा बालू गिट्टी से मुदवा दिहिन  रहै। जबै बारिस भे तौ वा बहिके सड़क के किनारे लाग गा अउर वहिनतान गढ़वा होइगे हवैं।
हिंया के नेता मंत्री अधिकारी सबै रास्ता से निकरत हवै। एकौ दरकी नहीं सोचत कि बनवा देई कत्तौ दुर्घटना न होइ जाये। पी.डब्लू.डी. विभाग के सहायक अभियन्ता डी.पी. का कहब हवै कि या सड़क के जिम्मेदार बांदा लोक खण्ड निर्माण विभाग हवै। उंई यहिका बनवइहैं।
यहिनतान सड़क के दूसर खगर जिला चित्रकूट, ब्लाक मानिकपुर, कस्बा पटेल नगर अउर जवाहर नगर के हवै। हिंया के आधा किलो मीटर सड़क छह महीना से बहुतै खराब हवै। या कारन लगभग तीन हजार मड़ई परेशान हवंै। बरसात के समय मा पानी भर जात हवै, तौ रात के निकरैं मा मड़ई गिट्टी से चोटा जात हवै। छोटा, शिपतिया, रामदास, दशरथ का कहब हवै कि छह महीना पहिले कच्ची सड़क बनी रहै, पै मड़ई चोटात नहीं रहै। अब छह महीना से गिट्टी बालू पर गे हवै, तौ अउर ज्यादा परेशानी हवै। कच्ची सड़क रहै, तौ नींक रहै। टाउन एरिया विभाग मा कइयौ दरकी कहा भी हवै, तौ कउनौ ध्यान नहीं देत आय। चेयरमैन ऊषा देवी के मनसवा सुन्दरलाल का कहब हवै कि वा सड़क के जांच करवा के दुबारा सड़क बनवाई जई।