महोबा खे लाने का सोचहे?

IMG_7817महोबा जिला में दो महीना पेहले से लोक सभा चुनाव को राजनैतिक युद्ध चल रहो हती। आखिर 16 मई 2014 खा ई खा परिणाम मिल गओ। ओर भारतीय जनता पार्टी खे प्रत्याशी पुष्पेन्द्र सिंह चन्देल खा विजयी घोषित कर दओ।
अब देखे खा जा हे कि नये सांसद पुष्पेन्द्र सिंह चन्देल महोबा जिला खे लाने का करहें? ऊसई तो  महोबा जिला में समस्यन खे कमी नइयां, पे पिये वाले पानी, किसानन खे आत्महत्या ओर हर जगह पहाड़ में पत्थर टोरें खा काम करें वाले बाल मजदूरन खे समस्या सबसे बड़ी हे।
का भारतीय जनता पार्टी खे सरकार ई समस्यन से आदमियन खा छुटकारा दिबा पेहे? पहाड़ में पत्थर तोड़ाई के काम खे तहत होय वाली घटनन खा ताजा उदहरण कबरई कस्बे के लौडा पहाड़ में चल रहे खनन खे कारन ऊखी गहराई लगभग तीन सौ फिट हो गई हे। जीसे 5 मई 2014 खा पहाड़ धंसे से आठ ट्रेक्टर दब गये हें। समय नींक हतो कि जोन समय पहाड़ धंसो ऊ समय ओते कोनऊ मजदूर न हतो। नई तो हजारन आदमियन खे जान खतरे में आ सकत हती।
अब सवाल जा उठत हे कि अगर पहाड़न खा खनन समय रहते न बन्द कराओ जेहे तो आज नई तो कल जा घटना दुबारा होहे। आगे बने वाली नई भारतीय जनता पार्टी सरकार खा आदमी की जा समस्या के बारे में सोचे खा चाही। महोबा की जनता अपने नये सांसद पुष्पेन्द्र सिंह चन्देल से अपनी समस्यन से छुटकारा पायें खे उम्मीद करत हे।