महतारी अउर बच्चा के होइगे मउत

mahila mudda (1)हिंया के भोला प्रसाद जयसवाल का आरोप हवै कि बहू खुश्बू का बच्चा पैदा करावैं खातिर सोनेपुर जिला अस्पताल मा 6 फरवरी का लइके गये रहौं। अस्पताल के डाक्टर नींक से जांच नहीं करिन। यहै से 7 फरवरी का बहू के मउत होइगे।
भोला प्रसाद जयसवाल का कहब हवै कि बहू खुश्बू के पेट मा पीरा होत रहैं। यहै से वहिका लइके 6 फरवरी के रात मा साढ़े नौ बजे कर्वी सोनेपुर जिला अस्पताल मा भर्ती करेंव। डाक्टर रात भर बहू का अस्पताल मा राखिन। यहिके बाद 7 फरवरी का सुबेरे चार बजे कहिन कि खुश्बू के पेट मा पीरा नहीं उठत। वहिका घर लइ जाव। यहै से घर लइके आय तौ खुश्बू के घर मा पांच बजे सुबेरे मरा लड़का पैदा भा। खुश्बू के हालत देख फेर से वहिका जिला अस्पताल लइके गयेन तौ डाक्टर वहिका इलाज नहीं करिन अउर वहिके मौत होइगे।
जिला अस्पताल के चिकित्सा अधीक्षक पी.डी. चैधरी कहिन कि खुश्बू के पेट मा पीरा नहीं होत रहै। वहिके बच्चा पैदा होय मा समय रहै। जबै खुश्बू का दुबारा अस्पताल लावा गा रहै, तबै तक वहिके मौत होइगे रहै।