बैंक मैनेजर के ऊपर घुस लेंय को आरोप

किसान बैंक मैनेजर से करत बातचीत
किसान बैंक मैनेजर से करत बातचीत

जिला महोबा, ब्लाक कबरई, कस्बा कबरई, इलाहाबाद यू.पी. ग्रामीण बैंक मे 20 मार्च खा किसानन ने बैंक मैनेंजर ने ऊपर रूपइया लेय को आरोप लगो के घेराव कर बैक के सामने धरना प्रर्दशन करो हे।
पहरा गांव के किसानन को आरोप हे कि एक तो हम बिन मौसम बारिस ओर ओलावृष्टि से परेशान हे। हमाओ जित्तो नुक्सान भओ हे, ओत्तो मुआवजा नई मिलत हे। दूसर अगर थोई बोहोत मिलत हे तो आधो बैंक मैनेजर ले लेत हे। सिरसी कलां गांव के एक ने कहो कि किसान के्रडिट कार्ट बनवाये में पांच हजार रूपइया ले लेत हे। नई तो भगा देत हे।
बैंक मैंनेजर आत्मराम गुप्ता कहत हे कि किसान झूठो आरोप लगाउत हे। हम कोनऊ से रूपइया नई लेत हे। बाहर आदमी दलालन खा देत हे तो में का कर सकत हों। में तो कहत हो कि जोकोनऊ लेत हो तो मोये एते पकर के लाये।

   न होत हंगामा तो न मिलत रूपइया

एसई परसाहा गांव के निरभान ने बताओ की मोये नाम लोहिया आवास पास भओ हतो। मेनें इलाहाबाद यू.पी. ग्रमीण बैंक में खाता खोलाओ हतो। मोये खाता में आवास बनवाये खे लाने एक लाख सैतिस हजार पांच सौ रूपइया आओ हतो। मोई पास बुक पेहले प्रधान प्रतिनिधी बारेलाल लाये रहो हतो। 17 अप्रैल खा में पासबुक लेके बैंक गओ ओर पचास हजार रूपइया निकारे खा कहो तो बैंक मैनेजर कहत हतो की तुम्हाये पास बुक में रूपइया नइयां। तुमने निकार लओ हे। जा बात मेने किसान यूनियन के अध्यक्ष जगराम तिवारी से कहो। 18 अपै्रल खा हंगामा करो हे। बैंक मैनेजर कहत हे कि धोखे से कम्प्यूटर में चढ़ गओ हतो। पासबुक मगां के देखो हे। ऊखे पूरो रूपइया दओ जेहे।