बेटी के बलात्कार और हत्या के लिए न्याय के इंतज़ार में रानी,चित्रकूट जिले के कर्वी में

जिला चित्रकूट, कस्बा कर्वी, मुहल्ला शंकर बाजार 14 जनवरी 2017 का 12 साल के लड़की का बलात्कार कइ के हत्या कइ दीन गे रहै। दूसरे दिना लड़की के लाश बोरिया मा मिली रहै। पै पांच महीना होय के बाद भी लड़की के महतारी बाप नियाव खातिर भटकत हवैं। पुलिस प्रशासन आज नहीं कल कहि के नियाव नहीं करत आहीं। तबै सांझी आवाज नेटवर्क नाम के संस्था बहुतै मदद करिस हवै अउर 10 मई का कैडिल जला के हड़ताल करिन हवैं।
लड़की के महतारी रानी बताइस कि पांच महीना होइ गे हवैं पै हमें अबै तक नियाव नहीं मिला आय। पुलिस आज कल करत रहत हवै। जबै संस्था वाले आवाज उठाइन हवैं तौ तीन दरकी पुलिस आयी हवै। पुलिस अबै तक कउनौ का नहीं पकड़िस आय। हम चाहित हन जउनतान हमार लड़की के हत्या कीन गे हवै। हत्यारा का भी वहिनतान सजा मिलै। जबै से मोर लड़की साथै इनतान के घटना भे हवै तौ बहुतै डेर लागत हवै। यहै कारन जबै मैं काम करे जात हौं तौ आपन सब बच्चन का लइ के जात हौं। काहे से अब मोहिका कउनौ के ऊपर विश्वास नहीं आय।

हम चाहित हन जउनतान  हमार लड़की के हत्या कीन गे हवैं। हत्यारा का भी वहिनतान सजा मिलै।

चाइल्ड केयर संस्था के कार्यकर्ता अभिमन्यु का कहब हवै कि हम या घटना मा नियाव देवावै खातिर परिवार वालेन के मदद करे हन। काहे से लड़की का परिवार बहुतै गरीब हवै अउर परिवार मा कोउ बोले वाला नहीं आय। यहै कारन फरवरी मा 3 दिन तक धरना प्रदर्शन करे हन पै प्रशासन हमार कुछौ सुनवाई नहीं करिस आय ।
एस. पी . प्रताप गोपेन्द्र का कहब हवै कि या घटना मा अज्ञात के नाम रपट लिखी हवै नामजद रपट नहीं आय। यहै कारन अपराधी अबै तक नहीं पकड़े गें आहीं। हमार टीम जांच मा लाग हवैं।
नियाव के बात करी तौ पुलिस अबै भी नहीं बता पावत आय कि अपराधी कबै पकड़े जइहैं।

रिपोर्टर- नाजनी रिजवी

18/05/2017 को प्रकाशित