बिजली के तार, कटौती के समस्या

taza for webजिला चित्रकूट, ब्लाक कर्वी, गांव कर्वी माफी, शोभा सिंह का पुरवा। हिंया दुइ पीढ़ी से लगभग पांच सौ मड़ई अपने कइती से बिजली का तार खरीद के कनेक्शन लीने हवैं। बिजली विभाग कइती से तार के लाइन नहीं खिंची हवै।
पुरवा के लल्लू अउर कैलाश समेत दस लोगन का कहब हवै कि बिजली के खम्भा तौ लाग हवैं, पै वहिमा बिजली का तार नहीं लाग हवै। या कारन बिजली का कनेक्शन लें खातिर ज्यादा तार खरीदैं का परत हवै। काहे से कि खम्भा दूर हवै। जबै आंधी अउर तूफान आवत हवै, तौ बिजली का तार भी टूट जात हवै। वहिका जोड़ै अउर बनवावैं मा समय अउर रूपिया लागत हवै। यहिके खातिर कर्वी विधायक वीर सिंह पटेल से चार महीना पहिले कहे हन, पै आजौ तक बिजली का तार नहीं लाग हवै।
कर्वी विधायक वीर सिंह पटेल का कहब हवै कि बिजली का तार लगवावैं खातिर बजट पास होइगा हवै। बिजली का तार जल्दी लगवावा जई।
ब्लाक मऊ, गांव सेमरा, मजरा अतरी मोजरा। हिंया दुइ पीढ़ी से बिजली नहीं आय। यहै से सैकड़न मड़ई परेशान हवंै। हिंया के रामभवन, रामखेलावन सन्तोष, लालजी अउर उमेश का कहब हवै कि बच्चन के शादी करै मा अंधियार रहत हवै। लड़का बिटियन का पढ़ै खातिर परेशानी होत हवै। बिजली लाग जाये तौ परेशानी दूर होइ जाये। मऊ बिजली विभाग के लाइन मैन टीपू खान का कहब हवै कि जबै सरकार कइती ये पास होइ तौ बिजली लगवा दीन जई।