पोषाक राशि के करई छी इंतजार

प्राथमिक विद्यालय
प्राथमिक विद्यालय

जिला सीतामढ़ी, प्रखण्ड रीगा, पंचायत कुशमारी, गांव उफरौलिया टोला। उहां प्राथमिक विद्यालय में तीसरा से लेकर पांचवा तक के बच्चा के पोषाक राशि न मिललइ ह। जेई कारण बच्चा सब परेशान छथिन।
विद्यालय के बच्चा सरवेश कुमार, सीताराम कुमार, नेहा कुमारी, निरज कुमार कहलथिन कि हमरा सब के होली से पहिले छात्रवृति मिलल रहे। लेकिन पोषाक राशि न मिलल, पिछला साल पोषाक राशि मिलल रहे। लेकिन ऐई साल में आई ले इंतजार करई छी। गांव के लोग रामएकवाल महतो, सूरज महतो, सोमारी देवी कहलथिन कि सब विद्यालय में पोषाक राशि वितरण हो गेलई लेकिन ऐई स्कूल में बच्चा सब के न मिललई। विद्यालय के अध्यक्ष मदन कुमार कहलथिन कि हम सब जब बैठक करईले त पोषाक राशि के मांग करई छी।
प्रधानाध्यापक रामकृपाल ठाकुर कहलथिन कि पोषाक राशि पहला अउर दुसरा वर्ग के बच्चा के दिसम्बर 2013 में रूपईया पंद्रह हजार छौ सौ आयल रहई त उनचालिस बच्चा के शिविर लगाके वितरण क देली। लेकिन तीसरा से लेके पांचवा वर्ग के बच्चा के लेल रूपईया न आयल रहई। जेई कारण न मिललई। हम रूपईया के लेल इ बेर आवेदन प्रखण्ड शिक्षा पदाधिकारी के पास जमा कईली। लेकिन अभी रूपईया न आयल हई। जेई कारण न मिललई।
प्रखण्ड शिक्षा पदाधिकारी इसलाम अंसारी कहलथिन कि जिला में रूपईया न हई। जेई कारण लगभग पांच विद्यालय में रूपईया न गेल हई।