पुलिस के ऊपर घर में आगी लगायें को आरोप

जिला महोबा, ब्लाक जैतपुर, कस्बा कुलपहाड, मोहल्ला सोनकपुरा। एते को अवैध कब्जा न्यालय के आदेश से हटाओ जात हे। ईमे कित्ते परिवार घर से बेघर हो जेहे। ईखे लाने कोनऊ ध्यान नई देत हे। जभे कि ऊ 25 साल से रह के आपन परिवार पालत हे। कविता, ऊषा ओर सरमिला बताउत हें कि हमें कुलपहाड़ कोतवाली की पुलिस नई रहे देत हे। 20 दिन पेहले पुलिस वाले हमाये घर में आगी लगा दई हती जीमें हमाये घर के गृहस्थी को समान ओर कपड़ा जल गये हते। संध्या ओर राजवती कहत हे कि हम कबूतरा जाती के आदमी हे। पुलिस वालेन से परेशान होके हर तहसील दिवस में दरखास देत हे पे कोनऊ सुनवाई नई होत हे। हम आपन परिवार लेके किते जेहे। हमने 13 फरवरी 2015 खा डी.एम. वीरेश्वर सिंह खा दई हे। अगर हमाई सुनवाई न हो हे तो हम बादां लखनऊ ओर दिल्ली तक जेबी। कुलपहाड़ कोतवाली के एस.आई. रामकुमार मिश्रा ने बताओ कि ऊं लोग आगी लगायें को झूठो आरोप लगाउत हे। आदेश के कारन ओते को कब्जा हटवाओ जात हे। ईखी जांच के.पी सिंह करत हे कुलपहाड़ एस.डी.एम. रिजवान मोहम्मद ने बताओ कि अभे तक मोये एते कोनऊ की दरखास नई आई हे। अवैध कब्जा हटवायें को न्यायालय के आदेश हे। ऊ मोये एते दरखास देय, ऊखे बाद देखो जेहे अगर कहूं जमीन होहे तो रहें खा दई जेहे।