पियै खातिर पानी का तरसत

chatra copyचित्रकूट जिला, ब्लाक रामनगर, कस्बा राजापुर के मेन चौराहा मा लगभग पांच साल से हैण्डपम्प खराब हवै। लगभग हजारन मड़ई परेशान हवैं।
चौराहा के रानी, प्रेमा अउर रम्पुरिया गांव के राजा अउर सन्तोष बताइन कि हम बाजार करै आये रहे हवं तौ हैण्डपम्प खराब रहै। पानी पियै के परेशानी हवै। होटल मा जाय तौ कुछौ खरीदै का पड़त हवै तबै पानी पियै का मिलत हवै अगर हैण्डपम्प चलत होत तौ पानी पियै का परेशानी न होत 17 मई का राजापुर टाउन एरिया मा कहा गा हवै, पै अबै तक ध्यान नहीं देत आय।
राजापुर टाउन एरिया चेयरमैन लक्ष्मी प्रसाद वर्मा का कहब हवै कि हां हैण्डपम्प बाजार का खराब हवै। अब जल निगम मा कहा जई कि जल्दी हैण्डपम्प बनवा दीन जाय।
rauli kala copyकर्वी ब्लाक, गांव रौली कल्याणपुर के लोगन का कहब हव कि हमका पानी के समस्या बहतै ज्यादा हवै। हम गरीब लोग एक किलो मीटर दूर से पानी लइत हन। या समस्या एक साल से बनी हवै। कइयौ दरकी विधायक अउर अधिकारिन का लिखित दइ चुके हन, पै कुछौ नहीं भा आय।
रौली कल्याणपुर गांव का शिवधार समेत चार लोग डी. एम. का दरखास दे आय रहैं। वा बताइस कि पानी मड़इन का पियै का नही आय तौ जानवर कहां से पियै। कइयौ दरकी अधिकारिन से कहे हन, पै कउनौ नहीं सुनत आय। गांव मा पांच हैण्डपम्प हवै सब खराब हवैं। प्रधान से कहे हन वा भी नहीं सुनत आय। का कत्तौ हम गरीबन के सुनवाई होइ कि न होइ।
या मामला मा प्रधान गया का कहब हवै कि जमीन मा पानी नहीं आय तौ कहां से पानी लई हैण्डपम्प खराब रहै तौ बन गे हवैं। पानी के समस्या तौ हर जघा हवै का कीन जाये।
कर्वी विधायक वीर सिंह का कहब हवै कि दरखास नहीं आई आय। यहिकर पता कीन जई। पानी के दिक्कत बारिस शुरू होय के बादै खतम होइ सकत हवै।

रिपोर्टर – सहोद्रा देवी और मीरा जाटव