पानी ने मचाओ तबाही

बारिश में बरबाद भये घर
बारिश में बरबाद भये घर

महोबा जिला में ई साल बरसात के पानी ने बीस साल को रिकार्ड तोड़ दओ हे। जभे की पानी न बरसे से किसान खेती में अनाज न उगा पायें से परेशान रहत हते, पे एक महीना की लगातर बारिस के पानी ने आदमियन खा घर से बेघर कर दओ हे।
कबरई ब्लाक के श्रीनगर कस्बा में तालाब को पानी भर जाये से आधा कस्बा डूब गओ हे। जीसे लगभग एक दर्जन घर गिर गये हें। जिते पिये खा पानी नई मिलत हतो। ओतई तालाबन खा पानी घरन में घुसे के कारण लोगन खा रात-रात भर नींद नई आउत हे।
जैतपुर ब्लाक के अतरपठा गांव के रमेश अहिरवार, पंचा अहिरवार, हरिदास, मुढ़ारी गांव के सुमन अहिरवार पनवाड़ी ब्लाक के देवगनपुरा गांव के मुहम्मद नफीस, जब्बार खा, वाहिद खा, चरखारी ब्लाक गौरहारी गांव के खंेमचन्द्र कुशवाहा ई लोगन ने बताओ कि 29 अगस्त 2013 से लगातार तीन दिन की बारिस ने कहर मचा दओ हे। हर साल गर्मी, सर्दी ओर बरसात में पानी के लाने हा-हा कार मचत हती। ऊ क्षेत्रन में पानी के कारण हम लोग घर से बेघर हो गयें हें। घर गिर जाये से हम खाये ओर रहेे के लाने परेशान हें। हम आपन परिवार लेके किते जेहें, ओर किते रहंे। मजदूर आदमी बनी मजदूरी करके आपन ओर आपन परिवार पालत हते, पे ई साल पानी ने हमाओ जीबो हराम कर दओ हे। जभे ई खबरन खा लेके कुलपहाड़ एस.डी.एम. पी.के.जैन ओर महोबा एस.डी.एस अतुल कुमार से बात करी। ऊने बताओ कि जीखे घर गिरें हें, ऊखो सर्वे के बाद उन्नीस सौ से लेके पैंतिस सौ रूपइया मुआवजा दओ जेहे। 3 सितम्बर 2013 खा एक सौ चार चेक बन र्के आइं हती। जोेन अट्ठारह लोगन खा बांट दई हे। बाकी आदमी चेक लेय नई आयें आय। अभे पन्द्रह सौ आदमियन की दरखासे आई हें तोे ऊखी जांच चलत हे।