पानी खा लेके भई लड़ाई

जिला महोबा, ब्लाक कबरई, कस्बा कबरई शास्त्री नगर। एते 8 सितम्बर 2013 खा आरती ओर पप्पू की पानी भरे खा लेके लड़ाई भई हे। जीखी रिपोर्ट आरती ने कबरई थाने में करी हे।
आरती ने बताओ कि में 8 सितम्बर 2013 खा सबेरे सप्लाई वाले नल आउत हते। में पानी भरे गई हती। तभई पप्पू मोये गाली देन लगो। मोये घसीटत-घसीटत अपने घर के भीतर ले गओ ओर मोये पूरे परिवार वाले मारन लगे। जीसे मोये कान के बाला गिर गये हें, ओर मोयेे कपड़ा भी फट गये हें। एई से मेने कबरई थाने में रिपोर्ट करी हे।
पप्पू ने बताओ कि न मेने मारो ओर न गाली दई हे ऊ झूठ बोलत हे। ऊ पानी भरन आई हती, तो मोई मताई भी पानी भरन गई हती, जीसे पानी छू गओ। बस एई बात खा लेके लड़ाई भई हे।
कबरई थाने के मुंन्शी श्याम यादव ने बताओ कि ई केस के बारे में मोय कछु पता नइयां, नही कोनऊ मुकदमा लिखो हे। जभे एस.ओ. अशोक कुमार से बात करी तो ऊने बताओ कि 151 के तहत चालान कर दई हे।