पत्रकारन खा मिलो पुरस्कार

खबर लहरिया  को मिलो सम्मान
खबर लहरिया को मिलो सम्मान

30 मई 2014 खा महोबा में हर साल के जेसे ई साल भी हिन्दी पत्रकारिता दिवस मनाओ गओ हे। जीखे मुख्य अतिथि सांसद कुंवर पुष्पेन्द्र सिंह चन्देल हते। संचालन कर्ता हरिकृष्ण पोद्दार हते। ई दइयां “विश्वसनीयता की कसौटी में मीडिया” का विषय हतो। जीमें अलग-अलग पत्रकार ओर सामाजिक कार्यकर्तन ने अपने विचार रखे। ऊने कहो कि मीडिया को अपने आप में विश्वांस राखे खा चाही।
सांसद कुंवर पुष्पेन्द्र सिंह चन्देल ने महोबा को ज्यादा से ज्यादा विकास करायें खा कहो हे। साथ ही एक एसंो स्थान देय खा कहो हे जिते सब पत्रकार इकट्ठा होके आपन बात कर सकें। ई कार्यक्रम में तीन पत्रकारन खा सांसद के द्वारा सम्मानित करो गओ। जीमे खबर लहरिया भी शामिल हतो।
श्रीनगर क्षेत्र के अमर उजाला के पत्रकार के.के. सोनी, हिन्दुस्तान के पत्रकार रसीन खां ओर कम समय में आपन क्षेत्र में पहचान ओर अच्छी खबरन खा पकड़ में लाये खे लाने जिले को तीसर अखबार मान के खबर लहरिया खा गोपाल भाई स्मृति पत्र देके सम्मानित करो।

मई 2014 में खबर लहरिया की वेबसाइट खा पेहला पुरस्कार मिलो। अंतरराष्ट्रीय मीडिया संस्था ‘डाॅयच वेल’ ने खबर लहरिया की वेबसाइट खा विश्व स्तर को पुरस्कार दओ हे। ई प्रतियोगिता खा तय कर रहे जजन ने खबर लहरिया को खास चुनो काय से ई पेहली ऐसी वेबसाइट हे जीखा गांव की ओरतें अपने बल बूते पे चलाउत हें।