नाला की बाढ़ से परेशान आदमी

Mahoba Naala Baadजिला महोबा, ब्लाक कबरई, गांव तिन्दौली। ई गांव के लगभग पाच हजार आदमी बरसात के पानी से बोहतई परेशान हें। एते बरसात को पूरो पानी गांव में भर जात हे। जीसे गांव डूब क्षेत्र मे आ जात हे। सरकार ई गांव के कोनऊ ध्यान नई देत आय।
गांव के रहे वाले सुखनन्दन, बिहारी ओर ध्रुव प्रसाद ने कि सिजहरी गांव से निकर वाला तीन मीटर चैड़ा नाला हमाए गांव से होके जात हे। ई नाला में हर साल बाढ़ आ जात हे जीसे सबन के घरन में पानी भर जात हे। ई साल के जेसे पिछले साल भी गांव में पानी भर गओ हतो जीसे पूरे गांव के आदमियन खे सामान बरबाद हो गओ हतो। नाला के पानी में केऊ छिरिया ओर पडि़या जेसे जानवर बह गये हते। सरकार के एते से हमाय लाने कोनऊ राहत के सुबिधा नइयां। एक छोट पुलिया बारह साल पेहले बनी हती, ऊ पुलिया अब नीचे धस गई हे जीसे नाला का पानी नई निकर पाउत हे ओर गांव बहे के कगार में आ जात हे।
प्रधान फूलारानी के आदमी गजराज ने बताओ कि जा पुलिया क्षेत्र पंचायत तहत बनी हती। मेने पूर्व ब्लाक प्रमुख बालेद्र सिंह से कहो हतो, पे अभे तक कछु नई कराओ हे। मेने पुलिया की एक साल पेहले खुदाई कराई हती।
ई गांवन की समस्या का लेके दैवी आपदा लिपिक अखिलेश कुमार खरे से ईखे बारे में बात करी तो ऊने कहोे-महोबा बाढ़ क्षेत्र में नई आउत हे। एते नालन में बाढ़ की समस्या कोनऊ रिपोर्ट नई आई हे। बरसात के पानी से जिनके घर गिरे हे सामान का नुकसान भओ हे ऊखे लाने सरकार के एते से मुआवजा आओ हे जोन आदमियन खा मिल सकत हे।