नहीं मिला मजूरी का रुपिया

pahadi copyजिला चित्रकूट, ब्लाक रामनगर,गांव पहाड़ी, पुरवा पालन। हिंया के मड़इन का आरोप हवै कि मनरेगा के तहत खेत मा समतलीकरण का काम एक महीना कीने रहेन। वहिकर मजूरी अबै तक प्रधान नहीं दिहिस हवै।
पुरवा के इरफान अली,निजाम, इस्लाम, महबूब अउर मोहम्मद अली का कहब हवै कि एक महीना समतलीकरण भा रहै। वहिमा हम काम कीने रहेन। अब होली का त्यौहार भी निकर गा हवै। एकौ रुपिया प्रधान मजूरी का नहीं दिहिस हवै। यहिसे हमार होली का त्यौहार फींका पर गा रहै। अपने बच्चन का कुछौ नहीं खरीद पाये हन। मजूरी का प्रधान ननकी देवी से 15 मार्च का कहे हन, पै प्रधान ननकी देवी अबै तक कउनौ ध्यान नहीं दहिस हवै। यहिसे समस्या होत हवै। इनतान लागत हवै कि मजूरी मिली कि नहीं। प्रधान ननकी देवी का कहब हवै कि खेत के समतलीकरण के मजूरी के रुपिया खातिर ब्लाक मा ए.डी.ओ. चंद्रभान गुप्ता से कीने रहौं। उंई कहत रहैं कि बजट अई तौ लोगन के मजूरी का रुपिया मिल सकत हवै।
रामनगर ब्लाक के ए.डी.ओ. चंद्रभान गुप्ता कहिन कि लोगन के मजूरी का रुपिया आवैं वाला हवै। जइसेन रुपिया अई तौ दीन जा सकत हवै।