नई होत नाप लेखपाल करत मनमानी

जिला महोबा, ब्लाक कबरई, गांव डिगरिया। एते के मुन्नीलाल ओर भगवानदास को आरोप हे कि जमीन को मुकदमा जीते ओर एस.डी.एम. के आदेश हांेय के बाद भी लेखपाल हमाई जमीन की नाप नई करत हे। एई से हमने 2 जून खा महोबा तहसील दिवस में डी.एम.खा दरखास दई हे।

भगवानदास कहत हे कि मोई जमीन गाटा संख्या 483 हे। जीखो मुकदमा कोर्ट में चलत हतो। 5 दिसम्बर 2013 खा मुकदमा भी जीत गये हे, पे आज लेखपाल हमाई जमीन नापन नई गओ। जीसे हमाई जमीन में गांव के आदमी कब्जा करें हे। मुन्नीलाल ने बताओ कि मोई जमीन को गाटा संख्या 129 हे। जमीन नापे के लाने केऊ दइयां एस.डी.एम को आदेश भी हो गओ हे। लेखपाल ओर कानून गो से कहत हे तो ऊ नाप करे को अश्वासन देके भगा देत हे। हम हर दो तीन महीना मे जमीन नपाये के लाने किराओ लगा के महोबा आउत हे। नायब तहसील दार कर्मवीर ने बताओ कि ईखे बारे मोये कोनऊ जानकारी नइयां। अगर एसो हे तो लेखपाल से पता करो जेहे का मामला हे ओर नाप कराई जेहे।