नइयां अच्छी बस स्टाप

जिला महोबा, ब्लाक जैतपुर, कस्बा कुलपहाड़। एते के बसस्टाप खा बने लगभग चालिस साल हो गये हे, पे आज तक कोनऊ चीज की सुविधा नइयां। जीसे यात्रा करे वाली सवारियन खा परेशानी होत हे।
कमालपुरा को राजू कहत हे दस साल से जा बस स्टाप एसई हे। हम लोग बाहर दुकानन में जा फिर रोड के किनारे बेठ के इन्तजार करत हे। काय से कभऊं-कभऊं भीतर बस तक नई आउत हे। महोबा जाये वाली ऊषा कहत हे कि ईसे अच्छो तो रास्ता को पेड़ लगत हे। बेठ के हवा तो ले सकत हे। एते न तो बिजली, पंखा हे ओर न बठे खा जघा। प्रतिक्षालय में जानवर बेठत हे। जीसे गन्दगी ओर गोबर डारो रहत हे। पेड़ तरे बेठत हे तो गिलाव भरो रहत हे। जीसे बेठे से कपड़ा खराब हो जात हे। सवित्री बताउत हे कि मोये राठ जाने हे में बस को इन्तजार करत हों। एते पानी की कोनऊ व्यवस्था नइयां। एक हैण्डपम्प हे, ऊखो पानी भी गन्दो निकरत हे। महोबा डिपो के क्षेत्रिये प्रबन्धक सुनील शर्मा ने बताओ कि तीन महिना पेहले हमने प्रस्ताव बना के लखनऊ भेज दओ हे। जभे बजट आहे तो ओते को बस स्टाप नये तरह से बनावा के सब व्यवस्था करी जेहे।