धंसा चेकडैम, बनवावैं के मांग

chek daimजिला चित्रकूट, ब्लाक कर्वी, गांव सुदिनपुर। हिंया महावल नाला मा बना चेक डैम तीन साल पहिले धंस गा हवै। मड़ई मार्च मा सिंचाई विभाग का दरखास दइके चेक डैम के मरम्मत के मांग करिन।
गांव के दिनेश कुमार अमर पप्पू बताइन-“चेक डैम लगभग पच्चीस साल का बना हवै। या चेक डैम से पूरे गांव के लोग नहात रहै। तीन साल पहिले चेक डैम नीचे का धस गा हवै तौ यहिमा पानी नहीं रूकत हवै। यहै से अब सिंचाई भी नहीं होई पावै अउर जानवर पियासे हिंया हुंवा भटकत रहत हवै।”
प्रधान रामप्रकाश कहिस कि यहिके मरम्मत करावैं खातिर हर साल दसन चेकडैम से ढ़ाई सौ बिगहा खेती के सिंचाई होत रहै। या चेकडैम महावल नाला के ऊपर सिंचाई विभाग कइत से बनावा गा हवै। चेकडैम से पहाड़ के ऊपर से आवै वाला पानी इकट्ठा होत हवै। यहिका पानी बहुतै साफ सुधरा रहत रहै। चेकडैम के मरम्मत खातिर 18 अप्रैल का सिंचाई विभाग के एक्सीयन से भी मांग करे हौं। उंई बनवाने का भरोसा दिहिन हवै।
लघु सिंचाई विभाग के बाबू लालचंद्र कुशवाहा कहिन कि कइयौ दरकी सरकार का लिखित भेजी गे, पै मरम्मत खातिर बजट नहीं मिलत। अब फेर से योजना बनाइत हन। होइ सकत हवै कि मरम्मत न करवा के वहै नाला मा दूसर नवा चेक डैम बनावा जई।