राशन कार्ड खातिर परेशान मड़ई

Kamut_grain
अनाज के लिए परेशान

जिला चित्रकूट ,ब्लाक रामनगर, कस्बा रामनगर। हिंया के लल्लू का दस बरस से कउनौतान का राशन कार्ड नहीं बना आय। या कारन वा बहुतै परेशान हवै। राशन कार्ड बनावैं खातिर कइयौ दरकी पंचायत मित्र अउर प्रधान कामता प्रसाद से कहा गा, पै कउनौ ध्यान नहीं देत आय।
पंचायत मित्र राजकुमार का कहब हवै कि अबै राशन कार्ड नहीं बनत आय। जबै बनिहैं तौ बनवा दीन जई।
लल्लू का कहब हवै कि गरीबी से परेशान रहत हौं। बजार से मंहगे दाम मा गेहूं, चावल अउर चीनी खरीदैं का परत हवै। अगर राशन कार्ड बन जाये तौ इं समस्या से न जूझै का परै। पता नहीं कि सरकार कउनतान के गरीबन का राशन कार्ड बनावत हवै।
यहिनतान राशन कार्ड के दूसर समस्या जिला चित्रकूट, ब्लाक मऊ, गांव पूरब पताई मा हवै। हिंया के कुसमा, मीरा अउर चंदन समेत लगभग पांच मड़इन का कहब हवै कि बारह बरस से कउनौतान का राशन कार्ड नहीं बना आय। या कारन मिट्टी का तेल चालिस रूपिया लीटर का लइके जलाइत हन। रहैं खातिर घर भी नहीं आय। झोपड़ी बना के रहित हन। बरसात मा पानी अउर जाड़े मा ठंडी से ठिठुरित हन। अगर राशन कार्ड बन जाये अउर कालोनी मिल जाये तौ हमहूं का थोइ आराम होइ जाये। यहिके खातिर कइयौ दरकी प्रधान ममता सिंह से कहा गा, पै वा नहीं सुनत आय ।
प्रधान ममता सिंह का कहब हवै कि जबै सरकार कइती से राशन कार्ड बनिहैं अउर कालोनी अइहैं तौ मड़इन का दीन जइहैं यहिमा मोर कउनौ गलती नहीं आय।