दस बरस से भटकत हौं

भइयालाल
भइयालाल

जिला चित्रकूट, ब्लाक कर्वी, गांव रगौली। हिंया का भइयालाल लोहार दस बरस से आपन जमीन खातिर परेशान हवै। वहिकर जमीन चकबन्दी करै मा दुसरे का दइ दीन गे हवै। या कारन वा अधिकारिन के चक्कर लगावत हवै। या कारन वा बुढ़ापे मा बहुतै परेशान हवै।
भइयालाल का कहब हवै-“ 2004 मा मोर पट्टा भा रहै। जेहिकर गाटा संख्या 1224 रहै। अब नवा नम्बर 2939 कब्जा दीन गा हवै, पै दुइ बिगहा नौ बिसुवा का पट्टा गांव के परदेसिया चिलमा के नाम कइ दीन गा हवैं। मोर जमीन मा अधिकारी कब्जा करवा लिहिन हवै। या कारन 2012, 2013 का पूर्व ए.डी.एम केशवदास का लिखित दीने रहेंव। जेहिसे नये तरीका से पट्टा करवा दीन जाये। दूसरे के पट्टा खारिज कइ दीन जाये तौ नींक होय।
लेखपाल नारायण प्रसाद का कहब हवै कि 2012 मा जमीन का चकबन्दी मा दइ दीन गे हवै। या कारन मड़इन का पट्टा कीन गा हवै। भइयालाल के जमीन का नाम अउर जांच चलत हवै। यहिके बाद कुछौ होइ सकत हवै।
प्रधान दिलीप का कहब हवै कि भइयालाल का नियाव मिलै का चाही। सरकारी जमीन आय या से वा भी ज्यादा कुछ नहीं कइ सकत आय।
या मामला मा डी.एम. बलकार सिंह कहिन कि भइयालाल अदालत मा दरखास डालै तबै उंई आगे कारवाही करिहैं।