दरोगा ने वकील खा गोली मार करी हत्या

11 मार्च 2015 खा इलाहाबाद में वकील ओर दरोगा के बीच में पुराने केश मे फाइनल रिपोर्ट लगाये के ऊमें भई नोंक झोंक के कारन दरोगा ने वकील नबी अहमद के ऊपर गोली चला दई हे। जीसे नबी अहमद की मोत हो गई हे। जीसे पूरे प्रदेश के वकीलन ने अपने जिला के तहसीलन में पुलिस प्रसासन के नारा लगा के एक दिन को हड़ताल करो हे।
महोबा जिला के वकील सुखनन्दन सिंह, पूर्व अध्यक्ष, मुर्कुरहमान, जागेश्वर यादव पूजा ठाकुर ओर सीमा ठाकुर ने कहो कि इलाहाबाद न्यायलय के भीतर अदालत में नारीबारी के चैकी इन्चार्ज शैलेन्द्र सिंह दरोगा ने गोली मार के हत्या करी हे। दरोगा के ऊपर मुकदमा लिखो जाये ओर ऊ जेल भेजो जाये।
राजकुमार दिवेद्वी, रामशरण सक्सेना ओर मुकुन्दी यादव के साथे सैकड़न वकीलन कहत हे कि परिसर मे पुलिस ने वकीलन के ऊपर जोन लाठी चलाई हे, ऊखी हम निन्दा करत हे। नबी अहमद के परिवार खे लाने पचास लाख रूपइया हरजाना दओ जाये।