तीस साल से मैदान पक्का करैं के मांग

या हालत मा है गल्ला गोदाम मण्डी
या हालत मा है गल्ला गोदाम मण्डी

बड़ोखर खुर्द ब्लाक के राशन वितरण के गल्ला गोदाम मण्डी बांदा शहर के बाबूलाल चैराहे मा तीस साल से है। या गोदाम से बांदा शहर अउर बावन ग्राम पंचायतन के डेढ़ सौ कोटेदार हर महीना राशन उठावत हैं। या गोदाम का मैदान दलदल से भरा है। या मारे कोटेदारन का आपन साधन दलदल मा ही ठाड़ करैं का परत हैं।
जिला बांदा, ब्लाक बड़ोखर खुर्द का गांव तिन्दवारा के कोटेदार बासदेव अउर उजरेहटा के पुष्पेन्द्र बतावत हैं कि गल्ला गोदाम मण्डी का मैदान कच्चा है। यहिसे बरसात के समय मैदान कादौं से भर जात है। राशन लें आवैं मा साधन दलदल मा ठाड़ रहत हैं। या मारे गल्ला लादैं मा मजदूरन का भी बहुतै दिक्कत होत है। डेढ़ सौ कोटेदार या बरसात के मौसम मा पचास-पचास रूपिया का चन्दा करिन अउर गिट्टी डलवाइन। या समस्या का सुधारैं खातिर कइयौ दरकी नगर पालिका और एस.डी.एम. का दरखास दीन गे है।
गल्ला गोदाम मण्डी का बाबू जागेश्वर बतावत है कि नगर पालिका का जेई सुरेन्द्र कुमार मिश्रा लगभग आठ दिन पहिले जांच करैं आवा रहै। कारवाही कुछ नहीं कीन गे आय। हमार मांग है कि या मैदान का पक्का करा दीन जाय।बांदा एस.डी.एम. गिरीश कुमार शर्मा कहत हैं कि मण्डी के अगल-बगल गैरेज के दुकान हैं। जेहिके कारन बहुतै गन्दगी होत है। अगर गल्ला गोदाम मण्डी के करमचारी होंआ के गैरेज दुकान वालेन का सामान हटवा दें तौ गोदाम के मैदान का पक्का करावा जा सकत है।