टूट नाली अउर सफाई के समस्या

या हवै नाली के हाल
या हवै नाली के हाल

जिला चित्रकूट, ब्लाक कर्वी, गांव रेंहुटिया। हिंया दलित बस्ती मा पूर्व प्रधान रानी देवी के समय मा नाली बनी रहै। अब वा नाली दुइ बरस से टूट हवै। या कारन गंदा पानी पूर रास्ता मा फइलत हवै। नाली बनवावैं खातिर कइयौ दरकी प्रधान बेसनिया से कहा गा।
गांव के कैलाश प्रसाद, नवल किशोर अउर मंजू देवी समेत बीस लोगन का कहब हवै कि लगभग तीन सौ मीटर नाली जघा-जघा से टूट हवै। हमरे नहाये धोवै का पानी रास्ता मा फइलत हवै। बारह महीना बरसात बनी रहत हवै। या कारन चार पहिया साधन नहीं निकर पावत हवै। छोट-छोट बच्चा गन्दे पानी मा गिर जात हवैं। नाली बन जाये तौ हमार इं सबै समस्या खतम होइ सकत हवैं।
प्रधान बेसनिया देवी के मनसवा बजरंग प्रसाद का कहब हवै कि पहिले नाली के सफाई होइ यहिके बाद नाली बनी।
ब्लाक मऊ, गांव गाहुर मजरा आजाद पुरवा। हिंया एक बरस से नाली के सफाई नहीं भे आय। या कारन लगभग तीन सौ मड़ई गन्दगी से परेशान हवै। रमेश प्रसाद, दीप कुमार, दीपलाल अउर रातरानी समेत दस लोगन का कहब हवै कि घर का गन्दा पानी अउर हैण्डपम्प का पानी पूर रास्ता मा फइलत हवै। या कारन छोट-छोट बच्चा गन्दे पानी से नहीं निकर पावत। गंदा पानी भरा होय के कारन मच्छर बहुतै लागत हवैं। या कारन कइयौ बीमारी होइ सकत हवंै। यहै से बहुतै दिक्कत हवै। नाली के सफाई होइ जात तौ नींक होइ।
प्रधान मौजीलाल पाल का कहब हवै कि सफाई कर्मी से कहत हौं कि आजाद पुरवा जा तौ वा कहत हवै कि जूनियर, प्राइमरी स्कूल अउर पंचायत भवन मा सफाई करत हौं। यहै मा समय लाग जात हवै।
सफाई कर्मी कुबेर का कहब हवै कि तीन जघा सफाई करत हौं। यहै से समय नहीं बचत आय।