टूटी परी पुलिया

बिजली विभाग वालेन ने टोरी सड़क
बिजली विभाग वालेन ने टोरी सड़क

जिला महोबा, ब्लाक पनवाड़ी, कस्बा पनवाड़ी। एते के वार्ड नम्बर पन्द्रह में बनी पुलिया खा बिजली विभाग वालेन ने ने 1 सितम्बर 2013 खा टोरवा दई हती। जीसे ओते से निकरें में बोहतई परेशानी आउत हे।
एते के दुकानदार मोहनलाल, पन्नालाल, रामपाल ओर जमुना ने बताओ कि जा हमीदिया कालेज जाये की पुलिया 1 सितम्बर 2013 खा बिजली विभाग वालेन ने टोर दई हती। एते बिजली पावर हाउस में इत्तो पानी भरो हतो के जोन ट्रान्सफारमर धरे हते, ऊ आधे-आधे डूब गये हते। पे पुलिया टोरे के बाद अब बनवायें खा कोनऊ नाम नई लेत हे। अब ऊ टूटी पुलिया से स्कूल बस या कोनऊ साधन निकरत हें तो डर लगो रहत कि कहूं कोनऊ प्रकार की घटना न हो जाय। एई से सबने मिलके ऊ पुलिया में पत्थर ओर बालू डार के निकरे के लाने बनाओ हे।
बिजली पावर हाउस के जेई दिनेश मौर्य ने बताओे कि पूरे बिजली पावर हाउस में पानी भर गओ हतो। एई से हमने सबके कहें से जा पुलिया जेसीबी मंगवा के टोरवा दई हती।
प्रधान आशाराम ने बताओ कि पानी को ज्यादा भराव के कारण पुलिया टोरी गई हती, नई तो पूरो पनवाड़ी कस्बा में करंट फेल जातो। हमाये पास इत्तो बजट नइयां कि पुलिया बनवा दे।
बी.डी.ओ. दीनदयाल ने बताओ कि दो या तीन दिन में सचिव खा भेज के जांच कराई जेहे। जांच के बाद ओते काम चालू करा दओ जेहे।