टंकी बने के करत मांग

जिला महोबा, ब्लाक पनवाड़ी, गांव रिवई। ई पूरे गांव में खरउआ पानी होय से एते के चार हजार आदमी केऊ पीढि़न से मीठो पानी पिये खा तरसत हें। काये से पानी ले जाये खे लाने आधा किलो मीटर दूर जाने परत हे। एई से ओते के आदमी बोहतई परेशान हें।
गांव की रहे वाली माया, हरबाई, देवकी, श्रीचन्द्र ओर राकेश ने बताओ कि हमाये ई गांव में देखें के लाने दस हैण्डपम्प लगे हें, पे पानी सबन को खारो हे। एईसे हमें पियें खे लाने आधा किलो मीटर दूर कुंआ से पानी लाने परत हे। जोन पानी लेय नई जा पाउत हे,ऊखें खारों पानी पियें खा परत हे। काये से ऊ कुंआ खेतन के एते हे। एइसे ओते जाये खे लाने नींक रास्ता भी नई हे। कभऊं-कभऊं बूढ़े ओर छोटे बच्चा पानी लेके गिर जात हंे। जीसे ऊखे गम्भीर चोटे भी आ जात हे-। एई से पानी के लाने टंक धरायें खे लाने प्रधान से केऊ दइंयां कहो हे, पे अभे तक ऊने कछु नई करो आय।
प्रधान अशोक कुमार ने बताओ कि मेंने टंकी धरायें खे लाने डेढ़ महीना पेहले प्रस्ताव बना के विकास खण्ड भेज दओ हे। ओते से अभे तक कोनऊ कार्यवाही नई भई आय।=