जर-जर परो प्रतीक्षालय

जर-जर प्रतीक्षालय में बेठे यात्री
जर-जर प्रतीक्षालय में बैठे यात्री

जिला महोबा, ब्लाक चरखारी, कस्बा खरेला, बसस्टैण्ड। एते बीसन साल पुरानो यात्री प्रतीक्षालय बनो हे, जीखी कभऊं पोताई ओर सफाई नई भई आय। दुकानदार प्रतीक्षालय के पोताई ओर सफाई के मांग करत हे।
कुलदीप तिवारी ओर आनन्द बताउत हें कि जा प्रतीक्षालय में रोज सैंकड़न आदमी गर्मी ओर धूप से बचे खे लाने बेठत हें। जा प्रतीक्षालय की दीवारन के साथे फर्स भी टूट गई हे। जीखे कारन मकड़ी ओर छोट-छोट बरसाती कीड़न ने ईखा आपन घर बना लओ हे।
अमित पाण्डे ने बताओ कि एक हफ्ता पेहले हमने जा प्रतीक्षालय को जाला ओर गन्दगी साफ करी हे। नई एते बेठे खा एकऊ मन नई करत हतो। अभे सफाई तो हमने कर दई हे, पे अगर नगर पंचायत ईखी पुताई ओर मरम्मत करा देय तो नींक हो जाये।
खरेला नगर पंचायत के चेयरमैन सिद्धगोपाल ने बताओ कि खरेला में दो यात्री प्रतीक्षालय ओर एक गेस्ट हाउस हे। जीखे मरम्मत ओर पुताई के लाने स्टीमेट बनाउत हें। जभे स्टीमेट पास हो जेहे तो मरम्मत ओर पुताई करा दई जेहे।