जमीन के विवाद मा मारपीट

प्रधान रामबहोरी
प्रधान रामबहोरी

जिला बांदा, ब्लाक नरैनी, गांव राम नगर निस्फ अउर तिन्दवारी ब्लाक का गांव जसईपुर। इं गांवन मा जमीन के विवाद का लइके लडाई भे। 20 अगस्त 2013 का रामनगर प्रधान रामबहोरी के फसल गांव का नत्थू यादव उखार डारिस है अउर 23 जुलाई 2013 का हाथ तोड़ डारिस है। यहिनतान 20 अगस्त 2013 का जसईपुर गांव के बुद्धराज का शंकर यादव मारिस है।

प्रधान रामबहोरी बतावत है-“मोर अउर नत्थू के कउनौ लडाई नहीं रही आय। कुछ दिन पहिले जमीनी विवाद का लइके मोरे भतीज अउर नत्थू के बीच लड़ाई भे रहै। वहै बात का लइके नत्थू, कमलेश अउर रामखेलावन मिल के जान लें के नियत से मारपीट करिन। अगर मड़ई बीच बचाव न करत तौ जान से मार डारत। एक हाथ तोड़ डारिन हैं। यहिके रपट लिखावैं का मैं कालिंजर थाना गयेंव, पै थानाध्यक्ष मोर रपट नहीं लिखिस आय अउर ऊपर से गुण्ड़ा एक्ट के धारा लगा के जेल भेजैं के धमकी देत रहै। वहै विवाद के चलत नत्थू मोरे खेत मा बोई मूंग अउर अरहरी के फसल का उखाड दिहिस है। यहिके दरखास भी थाना मा दीन है।”
नत्थू का भाई दुरखन कहत है-“हम जेहिकर खेत बंटाई का लीने रहन वहिके अउर प्रधान के बीच जमीनी विवाद है। या बात का लइके प्रधान हमरे भाई का घर मा बेंड के पहिले मारिस रहै। दरोगा के छुडावैं मा वहिके जान बच पाई रहै। या मारे हमार भाई भी प्रधान का मारिस है।” कालिंजर थाना का मुंशी भरत लाल कहत है कि धारा 151 के तहत नत्थू हन का जेल भेजा गा रहै। फसल उखाडै़ के सूचना आई है तौ वहिके जांच कराई जई।
यहिनतान जसईपुर का बुद्धराज कहत है कि 20 अगस्त 2013 का गांव का शंकर यादव दुवारे से निकरै का लइके मोहिका गाली गलौज करिस है अउर मारिस है। यहिके रपट मैं तिन्दवारी थाना मा लिखाये हौं। शंकर यादव कहत है कि या मोर दुवारे मा गोरू बांधत है, तौ मैं आपन दुवारे मा गोरू बांधै का मना करे हौं। यहै बात लइके लडाई भे है।
तिन्दवारी थाना का मुंशी इसराइल खां कहत है कि मारपीट का मुकादमा लिखा गा है।