जगह जगह सूखा परा तालाब अउर माइनर

dc871b66-9f57-4026-ac82-57f55bc998ecजिला फैजाबाद अउर अम्बेडकर नगर। हिंआ हर ब्लाक मा जगह जगह तालाब अउर माइनर नदी सब सूख गै बाय। जानवर पशु पक्षी सब पानी प्यास के मारा यहरी वहरी भटकत हईना। जिम्मेदार तालाब मा पानी भरावै खातिर आदेश कै इंतजार करत हईन।
तारून ब्लाक के तारापुर गांव कै प्रदीप तारा, कलावती कै कहब बाय कि तालाब, नदी, माइनर मा पानी न होय के कारन जंगली जानवर पानी पीये खातिर यहरी वहरी भटकत हईन। जलालपुर ब्लाक के मुरवाह गांव कै नन्हेंलाल कै कहब बाय गांवन मा जेतना तालाब बाय सब सूखाय गै बाय। पशु पक्षी प्यासा मरत हईन। तालाबन मा पानी भरवावै कै मांग डी. एम. से करिन।
तकमीनगंज कै सीता बताइन कि तालाब अउर नदी मा पानी न होय से नल भी पानी देब बंद कई दिहिन। जेसे पानी खातिर काफी दिक्कत कै सामना करै परत बाय।
प्रधान सावित्री यादव प्रतिनिधि रामशंकर यादव बताइन कि विभाग से तालाबन मा पानी भरावै कै आदेश नाय भै बाय। जलस्तर नीचे चला जाए से पानी कै कमी होई गै बाय।
तारून ब्लाक कै ए. डी. ओ. पंचायत शेष देव पाण्डेय बताइन कि तालाबन मा पानी भरावै कै आदेश अबहीं जिला से नाय मिला बाय। जब आदेश होय तब तालाबन मा पानी भरवाय जाए।