घटना होय खे बाद बनहे सडक

उखड़ी परी रास्ता
उखड़ी परी रास्ता

जिला महोबा, ब्लाक पनवाड़ी, गांव सलैया। एते पनवाड़ी कस्बा के पाठकपुरा मोहल्ला से सलैया गांव तक लगभग पन्द्रह किलो मीटर सडक दो साल से खराब परो हे। जीखे बनवाये खे लाने कोनऊ ध्यान नई देत आय।
आटो ड्राइवर अमरचन्द्र ओर तेजसिंह ने बताओ कि जा सडक से लगभग बीस गांवन खा आदमी निकरत हे। ओर पचासन छोट-बड़े साधन निकरत हें। काय से एई सडक सब गांवन खे लाने मेन सडक हे। ई सडक लगभग पांच साल पेहले अच्छी खासी हती, पे एते दो साल से इत्तो खराब हो गओ कि सूखे मौसम में भी निकरें में डर लागत हे। बरसात में तो एसो लागत हे कि चाहे सूखी रोटी खा लेबी, पे पनवाड़ी कस्बा बाजार करे न जेबी। काय से ई सडक में इत्ते बड़े-बड़े गड्ढा हो गये हें कि तनकऊ ध्यान न करे तो हाथ-पांव टूट जाय। बुडेरा गांव के सुरेश बताउत हे कि पनवाड़ी से तीन-चार किलो मीटर जाये खे बाद जभे एक नदी के एते पोंहचत हे तो एसो लागत हे कि अगर ड्राइवर तनकऊ लापरवाही कर देय तो पूरा आटो नदी में गिर जेहे। अभे तक कोनऊ एसी घटना नई भई आय, पे आदमियन खे छोट-मोट चोटें आये दिन लागत रहत हंे। अब लागत हे कि जभे तक कोनऊ बड़ी घटना न हो जेहे तभे तक ई सडक बनवाये खा कोनऊ ध्यान न करहे।
पी.डब्लू.डी विभाग के टेक्निकल आफिसर एस.के. कौशिक ने बताओ कि पनवाड़ी से लेके स्योढ़ी गांव तक सडक बनवाये खे लाने प्रस्ताव बना के भेजो हे। प्रस्ताव पास होय के बाद सडक बनवाओ जेहे। काय से पनवाड़ी से स्योढ़ी तक सडक खराब हे।