गांव की शोभा बढ़ाउत बिजली के खम्भा

bijli wwजिला महोबा, ब्लाक जैतपुर, गांव भटेवरा खुर्द को मजरा सेला खालसा मे जनवरी 2016 मे विधायक निधी से ढाई सौ बिजली के खम्भा लगे हते, पे गांव मे अभे तक बिजली नईं पोहची हे। खम्भा गांव मे शोफीस बनके रेह गये हे।
जानकी कहत हे की ई मजरा की आवादी लगभग बारह सौ हे। पे पता नई गांव में कभे तक बिजली को मुंह देखे खा मिलहे। हम तीन साल से बिजली विभाग के चक्कर लगाउत हे। पे कोनऊ सुनवाई नई होत हे। गुड्डो बताउत हे की बिजली न होंय के कारन हमाये बच्चा पढ़ नई पाउत हे। जोन बिजली से जुड़ो काम होत हे, ऊखे लाने हम लोग छह किलोमीटर दूर से किराओ लगा के कुलपहाड़ आउत हे। मोबाइल चार्ज कराउने हे तो दुकान वाले पांच रूपइया लेत हे। क्षेत्र पंचायत सदस्य रेखा बताउत हे की बिजली के बिना 20 अपै्रल 2016 खा मोई तबियत खराब हो गई हती। आदमी तो आपन चारपाई लेके बाहर द्वारे मे सो जात हे। ओरते तो भीतर ही सोउत हे। रेखा को आदमी लालसिंह कहत हे की मोई ओरत नौ महीना गर्भ से हती, गर्मी के कारन अचानक तबियत हो गई। महोबा जिला अस्पताल ले गये तो ओते से डाक्टर ने झांसी रेफर कर दओ। झांसी के डाक्टर बढ़त गर्मी को कारन बताअे हतो। इलाज करायें मे मोओ पचास हजार रूपइया लगो हे।
प्रधान गौरी शंकर कहत हे की पन्द्रह दिन पेहले विधायक उर्मिला राजपूत से कहो हतो तो ऊने जल्दी गांव मे बिजली पोहचायें को अश्वासन दओ हतो।
विधायक उर्मिला राजपूतत को आदमी कप्तान सिंह कहत हतो की दूसरे गांवन में बिजली लगवायें को काम चालू हे। धीरे-धीरे हर गांव मे बिजली लगवाई जेहे।

रिपोर्टर – श्यामकली