खाली धरे जाब कार्ड

खाली जाब कार्ड दिखाउत
खाली जाब कार्ड दिखाउत

जिला महोबा, ब्लाक चरखारी, गांव सालट। एते चमरौड़ा पुरा में पचासन आदमियन खे सन् 2006-7 में जंाब कार्ड बने हते। जीमे आदमियन खा सौ दिन खा रोजगार मिले को नियम हतो, पे दसन आदमियन के जाब कार्ड बिल्कुल खाली धरे हें।
हरप्रसाद की जांब कार्ड संख्या (83) जमुनिया की जाब कार्ड संख्या (68) ने बताओ कि हमाये जंाब कार्ड सन् 2006-7 में बने हते। जीमे कोनऊ खा दस दिन तों कोनऊ खा बीस दिन काम मिलो हे। मनप्यारे जांब कार्ड सख्या (355) बताउत हे कि मोओ  जांब  कार्ड पूरो खाली धरो हे। सब आदमियन खा आरोप हे कि सरकार ने गरीब आदमियन खे रूपइया कमाये खे लाने जाब कार्ड बनवाये हें, पे प्रधान की मनमानी के चलत ओई आदमियन खा काम मिलत हे। जोन प्रधान की हां में हां मिलाउत हें।
मथुरा कहत हे कि में केऊ दइयां काम करे खे लाने गओ, पे प्रधान ने कह दओ कि जगह भर गई हे। अब काम न मिलहे। तभे से में काम करे नई जात हों।
प्रधान पुष्पा देवी के आदमी रामबाबू ने बताओ कि मोये गांव में लगभग चार सौ जाब कार्ड बने हें। जीमें लगभग डेढ सौ आदमी काम करे आउत हें। बाकी दिल्ली पंजाब ईटा पाथे चले जात हें। अभे शंकर जी के मंदिर के एते से नाला तक सम्पर्क मार्ग बनो हे। तभे मेने गांव में मुनादी करवाई हती कि जीखे काम करने होय ऊ आके आपन नाम लिखा देय, पे बीस आदमी काम करे आये हते। बी.डी.ओ. प्रदीप कुमार पाण्डेय ने बताओ कि अगर ओते के आदमियन खा काम नई मिलत आय तो मोये एते दरखास देके काम खंे मांग करें। हम ऊखो पन्द्रह दिन के भीतर काम देओ जेहे। अगर हम काम न दे पेबी तभे बेरोजगारी भत्ता दओ जेहे।