खानापूर्ति खा भरे समाजवादी पेंशन के फारम

रामनगर की ओरते डी.एम. कार्यालय में
रामनगर की ओरते डी.एम. कार्यालय में

महोबा शहर, मोहल्ला रामनगर। एते के सैकड़न ओरतन को आरोप हे कि नगर पालिका वाले खानापूर्ति खा हमाये समाजवादी पेंशन मे फारम भरे हे। जीसे हमने 6 फरवरी खा डी.एम. वीरेश्वर सिंह खा दरखास दई हे, ओर पेंशन की मांग करी हे।
मुलिया, नूरजांहा ओर रामदेवी बताउत हे कि हम कच्चे मकान मे पन्नी छाके रहत हे। हमाये दो-दो, तीन-तीन बच्चा हे, जीखे पढ़ाई में बोहतई खर्चा लगत हे। कभऊं मजदूरी लगत हे कभऊं नई लगत हे। जीसे ओर परिवार पाले में परेशानी होत हे।
पुष्पा ओर रामबाई को आरोप हे कि हम तो एक जिम्मेंदार अधिकारी सोच के 6 फरवरी खा डी.एम. के एते आपन समस्या सुनाउन गये हते, पे ऊ खुद कहत हतो कि जभे परिवार नई पाल सकत हो तो काय खा बच्चा पैदा करे हे। जभे अधिकार एसो कहत हे गरीबन की ओर कोन सुन सकत हे।
महोबा नगर पलिका की चेयरमैन पुष्पा अनुरागी ने बताओ कि मेने सर्वे नई कराओ हे। जा जिम्मेदारी एस.डी.एम. ओर लेखपाल की हती। ऊखे नाम केसे कटे हे मोये जानकारी नइयां। एक वार्ड में हजारन की संख्या मे आदमी हे तो सबखा पेंशन नई मिल सकत हे।